ಎಷ್ಟು ಕೊಟ್ಟರೂ , ಎಷ್ಟೇ ಬಿಟ್ಟರೂ 

ಇನ್ನಷ್ಟು ಮನಸಿನಲಿ  ಉಳಿದಿತ್ತು 

ಅದಕೆ 

ಅತ್ತು ಅತ್ತು ಕಣ್ಣೀರು ಬತ್ತಿತ್ತು 

ಅದಕೆ

 ನೀರಿದೆ, ಬೇರಿದೇ , ಗೊಬ್ಬರವಿದೆ 
ಆದರೆ ಜೊತೆಗೆ ದೊಡ್ಡ  ಕೊಂಬೆಯ ನೆರಳಿದೆ 
ಅದಕೆ ನಾ ಬೆಳೆಯಲಾರೆ 

ಅವನಿದ್ದಾನೆ, ಇವನಿದ್ದಾನೆ ,ಎಲ್ಲರಿದ್ದಾರೆ 
ಆದರೆ ಜೊತೆಗೆ ನನ್ನ ಅಹಂ ಇದೆ 
ಅದಕೆ ನಾ ಬೆರೆಯಲಾರೆ 

ದುಃಖ ಇದೆ , ಕಾಗದ ಇದೆ , ಪೆನ್ನೂ ಇದೆ 
ಆದರೆ ಜೊತೆಗೆ ಸುಖವೂ ಇದೆ 
ಅದಕೆ ನಾ ಬರೆಯಲಾರೆ 

ರಾಗವಿದೆ  ತಾಳವಿದೆ ರಸಿಕರಿದ್ದಾರೆ 
ಆದರೆ ಜೊತೆಗೆ ನೆಂಟರ  ಮಾತಿದೆ 
ಅದಕೆ ನಾ ಹಾಡಲಾರೆ 

ಕಾಲಿದೆ ಕೈ ಇದೆ ತಲೆಯೂ ಇದೆ 
ಆದರೆ ಜೊತೆಗಾರರ ಕಣ್ಣೂ ಇದೆ 

ಅದಕೆ ನಾ ಹೆಚ್ಚು ದುಡಿಯಾಲಾರೆ 

ಮರದ ಕಣ್ಣೀರಿಗೆ ಗೋರಿಯಿರಲಿ

 ಯಾರ ಹಣ್ಣಿನ ಆಸೆಗೋ , ಅವರದೇ  ಉಳಿದ ವಾಸನೆಗೋ 
ಜೊತೆಗೆ ಬೆಳೆದಿವೆ 
ಮರಕೆ ಬಳ್ಳಿಯೋ ಬಳ್ಳಿಗೆ ಮರವೋ
ತಿಳಿಯದಾಗಿದೆ .... ಬಿಗಿಯಲಾಗಿದೆ ದಾರ 

ತನ್ನ ಕರುಳಿನ ಬೇರಿಗೋ , ಹೂ ಚಿಟ್ಟೆ, ಮೊಟ್ಟೆ , ಹಾವಿಗೋ 
ಜೊತೆ ಜೊತೆಗೆ ಬೆಳೆಯುತಿವೆ 
ಮರಕೆ ಬಳ್ಳಿಯೋ ಬಳ್ಳಿಗೆ ಮರವೋ
ತಿಳಿಯದಾಗಿದೆ .... ಸಡಿಲಾಗುತಿದೆ ದಾರ 

ಬಾರದ ಮಳೆಯ ಬರಕೋ , ಬೀಸಿದ ಗಾಳಿಯ ರಭಸಕೋ 
ಜೊತೆ ಜೊತೆಗೆ ಬೇಯುತಿವೆ 
ಮರಕೆ ಬಳ್ಳಿಯೋ ಬಳ್ಳಿಗೆ ಮರವೋ
ತಿಳಿಯದಾಗಿದೆ .... ಸಡಿಲಾಗಿದೆ ದಾರ

ಹೊರದ ತನ್ನ ಭಾರಕೊ , ಮರಳಿದ  ಬಳ್ಳಿಯ   ಬೇಸರಕೋ 
ಜೊತೆ ಜೊತೆಗೆ ಕೊರಗುತಿವೆ 
ಮರದಿಂದ ಬಳ್ಳಿಯೋ ಬಳ್ಳಿಯಿಂದ ಮರವೋ
ತಿಳಿಯದಾಗಿದೆ .... ಹರಿದುಹೋಗಿದೆ ದಾರ

ತಾಳದೆ  ತಪ್ಪಿದ ಬಳ್ಳಿಯ ತಾಳಕೋ ,ಹಾಡದೆ  ಬಿದ್ದ ಮರದ  ಸ್ವರಕೋ 
ಜೊತೆ ಜೊತೆಗೆ ಬೀಳುತಿವೆ 
ಮರದಿಂದ ಬಳ್ಳಿಯೋ ಬಳ್ಳಿಯಿಂದ ಮರವೋ
ತಿಳಿಯದಾಗಿದೆ .... ಬಿದ್ದು ಹೋಗಲಿದೆ ಮರ . 

ಬಿದ್ದು ಒಡೆದಿತೇ  ಬಳ್ಳಿಯ ಹಣ್ಣಾಗದ ಕಾಯಿ ?

ಬೇಡ .. ಬೇಡ ... ಬೇಡ 
ಮರ ಬೀಳಲಿ .. .... ಚಿಟ್ಟೆ  ಹಾರಲಿ , ಹಕ್ಕಿ ಹಾರಲಿ , ಹಾವು ಸಾಯಲಿ 
ಮಳೆ ಸುರಿಯಲಿ ... ಬೇರು ಗೊಬ್ಬರವಾಗಲಿ, ಬಳ್ಳಿ ಬೆಳೆಯಲಿ , ಕಾಯಿ ಹಣ್ಣಾಗಲಿ
ಇಳೆಯ ಸೂರಿನಲಿ , ಬೆಳೆದ ನಾಯಿ ಕೊಡೆಯಡಿಯಲಿ , ಮರದ ಕಣ್ಣೀರಿಗೆ ಗೋರಿಯಿರಲಿ