ಆವಾ ಆವಿಯಾದ

ಅನ್ನವಿಲ್ಲ ಚಿನ್ನವಿಲ್ಲ ಇಲ್ಲ ಅವಗೆ ಉಡಲು ಅರಿವೆ
ಆಳಿಲ್ಲ ಅಳುವಿಲ್ಲ ಇಲ್ಲ ಅವಗೆ  ಜಗದ ಪರಿವೆ
ಆವ ಅರಸನಿಗೇನು ಕಡಿಮೆ

ತಿನಲು  ಚಿನ್ನದ  ತಟ್ಟೆ,  ಮೊಟ್ಟೆ ಬೇಕೇ ಅವನ ಆ  ಹೊಟ್ಟೆಗೆ
ಕೂರಲು ಕಲ್ಲಿನ ಕಟ್ಟೆ , ಚಟ್ನಿ ಸಾಕು ಎರಡು  ಒಣ ರೊಟ್ಟಿಗೆ
ತಿನಲು  ಅವಗೆ ಗೆಳೆಯರೊಟ್ಟಿಗೆ


ಉಪ್ಪ ನೀರನು ಹಳಿಯದೆ ಆವ ಮರಳ ಮೇಲ ನಡೆದ
ಪರರ ಸುಖವ ಬಯಸುತ  ಆವ ಪರಮ ಸುಖವ ಪಡೆದ
ಎಲ್ಲರೊಡನೆ ಆವ ಮಡಿದ

ಆವಾ
ಅರಸನಾದ
ಗೆಳೆಯನಾದ
ಅನುಭಾವಿಯಾದ
ಆವಾ ಆವಿಯಾದ ...ನೀರಾದ.... ಮಳೆಯಾದ ..ಮಣ್ಣಾದ

ಈಗ ನಾ ಮಲಗುವುದು ಕನಸಿನಲ್ಲಿ ಮಾತ್ರ

ನನಗೊಂದು ಕನಸು ಬಿತ್ತು
ಅದರಲ್ಲಿ
ನಾ ಬಯಸಿದ
ಅರಮನೆ
ಕಾರು
ತೋಟ
ಕೆಲಸ
ಮೋಜು
ಮೇಜವಾನಿ
ನನ್ನ ಹೊಗಳುವ ಜನ

ಎಲ್ಲಾ ಇತ್ತು
ಎಲ್ಲಾ ಇತ್ತು
ಆದರೆ ನಾನಿರಲಿಲ್ಲ

ಕಂಡ ಕನಸಿನ ಹಿಂದೆ
ಓಡಿ ಓಡಿ ನಾ ಬಂದಿದ್ದೇನೆ ಕನಸಿಗಿಂತ ಮುಂದೆ

ಕನಸಲ್ಲೂ ಬದುಕಿನ ಹಾಗೆ ನಾನಿಲ್ಲ
ಛೇ ಕನಸೂ ಕಲುಷಿತಗೊಂಡಿದೆ
ಇಲ್ಲ
ಇಲ್ಲ
ಬಿದ್ದ ಕನಸಿನಲ್ಲಿ ನಾನಿರಲಿಲ್ಲ
ಏಕೆಂದರೆ ನಾ ಮಲಗಿರಲಿಲ್ಲ

ಈಗ ನಾ ಮಲಗುವುದು ಕನಸಿನಲ್ಲಿ ಮಾತ್ರ